Monday, May 2, 2011

شيكولاتة بالبندق....7



دا حسام مع خطيبته الاولي"نهلة"طبعا كان واضح ان مفيش بينهم تفاهم

:D:D



وقومت من مكاني وروحت قعدت جمب بنت كانت قاعدة لوحدها

اللي خلاني اقوم واغير مكاني هو قلقي وخوفي من تكرار الأحداث اللي حصلتلي قبل كدا...انا رايحة اقدم لشغل جديد ومش بعيد اروح الاقيه بيشتغل في مكتب الترجمة اللي هااعمل فيه انترفيو...وبعدين يقعد يشاغلني لحد ما اتعلق بيه ...وبعدها بكام شهر الاقيه خطب وبعدين يفركش وبعدين يرجع يتقدملي واقوم انا طالعة فيه الطالعة التمام بعدها يرجع يعتذرلي وينقل شغل جديد في مكان بعيد ..في كازبلانكا مثلا....لالالا وعلي ايه وجع القلب دا كله...وعلي رأي المثل الباب اللي يجيلك منه الريح شيله وابني مكانه حيطة علشان ممكن الريح تكون شديدة وتقلع الباب

فتحت الشنطة وطلعت الموبايل والسماعات وطلعت شيكولاتة وكانت بالبندق.... بقيت بحبها جدا وبشتريها علي طول

ابتسمت للبنت اللي قعدت جمبها وعزمت عليها بواحدة

قالتلي: يااااااه جت في وقتها الشيكولاتة دي

ابتسمت وقولتلها: بالهنا والشفا

واتعرفنا علي بعض اسمها نهلة وعرفت منها انها نازلة اسكندرية تزور ناس قرايبهم وتقضي معاهم كام يوم واتبادلنا ارقام الموبايلات واتفقنا نتقابل هناك ونخرج سوا في كام خروجة مع بعض

بصراحة البنت كان دمها خفيف وروحها حلوة اوي وانا ارتاحتلها وحبيت الكلام معاها

المهم لما وصلت مكتب الترجمة لاقيت صاحبتي مستنياني

وقعدت انا وهي نتكلم وندردش لحد ماييجي دورنا في الانترفيو

حكيتلها علي اللي حصل في القطر وقولتلها: انا ما اعرفش في ايه .....الناس كلها بتركب القطر في امان الله الا انا...لا والشيكولاتة لتاني مرة بتلعب دور البطولة في الأحداث

صاحبتي: الحمدلله انك غيرتي مكانك احنا مش ناقصين

انا: اه ما انا قولت كدا برده...انتي عارفة انا دماغي بتوجعني ومش ناقصة

صاحبتي: دماغك برده اللي بتوجعك

انا: اه دماغي ياغلسة يارخمة ...

بعد ما خلصنا الانترفيو قالولنا انهم هايتصلوا بينا في اقرب وقت...تقريبا كل االناس بيقولوا كدا في الانترفيوهات...يتصلوا بقي ولا مايتصلوش ...مش هاتفرق كتيير

خرجت انا وصاحبتي نتفسح واتصلت علي نهلة وعزمتها تيجي تخرج معانا ....وقضينا وقت جميل مع بعض ..حتي صاحبتي اتبسطت منها اوي وارتاحتلها

لما جه ميعاد رجوعي للقاهرة كنت بحجز تزكرة القطر قابلت نهلة قدام شباك التزاكر

وقولتلها: انتي مش قولتي ان لسه ادامك اسبوع علي الاقل قبل ماترجعي القاهرة...طيب ماقولتليش ليه كنا سافرنا سوا واستنيتك

هي: والله يانغم حصلت ظروف طارئة واخدت قرار اني هاارجع القاهرة امبارح بالليل وبعدين انتي ماعرفتنيش انتي هاتسافري امتي بالظبط

انا: ظروف ايه ...طمنيني

هي: لا مفيش حاجة ...ظروف عائلية

انا: لا ان شاء الله خير

وركبنا القطر وقعدنا نتكلم وبعدين لاقيتها بتقوللي

تعرفي يانغم انا ماكنتش مستريحالك في الأول..بس بعد كدا حبيتك اوي والله

انا: طيب ماكنتيش مستريحالي ليه في الاول

هي: واحنا بنتعرف علي بعض لما قولتيلي ان اسمك نغم...وانا الاسم دا بيدايئني

انا: اشمعني بئي...انتي كنتي تعرفي بنت اسمها نغم وماكنتش كويسة صح؟

هي: ولا اعرفها ولاعمري قابلتها...

انا: امال ايه

هي:.اصل انا كنت مخطوبة قبل كدا وخطيبي كان دايما يغلط في اسمي ويقوللي يانغم...لما سألته مين نغم دي ..شكلك بتحبها اوي..كان بيقوللي دي واحدة زميلتي في الشغل وبحكم التعود والاحتكاك اسمها لازق في لساني ...

بلعت ريقي وقولتلها: واحدة زميلته في الشغل؟!!!!!!! وبعدين كملي

هي: انا ماصدقتش انها مجرد زميلة له والسلام...

انا: شغل ايه دا اللي مخلي اسم زميلته لازق في لسانه لدرجة انه ينادي خطيبته بااسمها

هي: ماانا ماصدقتوش...لان شغله ماكانش فيه ضغط او تعامل مع بنات وقت طويل

انا: هو كان بيشتغل ايه

هي: محاسب في شركة استيراد وتصدير

جالي احساس وقتها ان البنت اللي بتتكلم عنها دي تبقي انا وخطيبها دا يبقي حسام وكنت عاوزة اسألها هو اسمه ايه بس ماسألتهاش لأني كنت حاسة اني ارتبكت واتوترت وباين عليا وقولت لو سألتها أي سؤال عنه او عنها احتمال كبير تشك فااتظاهرت ان الموضوع مش في بالي

انا: وفركشتوا الخطوبة علشان السبب دا

هي: مش بالظبط بس تقدري تقولي ماحصلش بينا تفاهم كنت حاسة انه بعيد عني ...كل حاجة مابينا روتين في روتين....فمحصلش نصيب وماكملناش مع بعض

ورديت عليها وقولتلها: الحمدلله علي كل شيء..ماتزعليش نفسك اكيد مالكيش خير فيه

هي: الحمدلله علي كل شيء...هو اصلا سافر تونس والحكاية خلصت خالص

ايوا هو حسام...وانا نغم اللي بتتكلم عليها

بحاول استوعب اللي قالته وحكيته ومش قادرة اصدق

هو يعني كل لما اركب القطر لازم اطلع منه بحكاية كدا...

انا اعرف اه ان الدنيا صغيرة ...يعني اقابل واحد في القطر وبعدين بعدها بكام شهر نبقي زمايل في شغل واحد واتعلق بيه واحبه..انما مااعرفش ان الدنيا صغيرة لدرجة انها تبقي اوضة وصالة...والشخص اللي احبه اقابل البنت اللي كان خاطبها لا والتقيل بئي نتعرف علي بعض ونبقي اصحاب

فضلت قاعدة طول القطر ساكتة زي اللي واكلة سد الحنك وزي ليه انا فعلا سامعة كلام يسكتني اكتر من سد الحنك نفسه

انا ايه بس اللي كان خلاني اقوم اغير مكاني...خوفتي يااختي لتتكرر نفس الحكاية مع شخص تاني....اديكي اهو مكملة في الحكاية الاولي بروح وعزم الشباب...وبعدين ماشي غيرتي مكانك..شملولة اوي عمالة توزعي شيكولاتة بالبندق علي الناس وتتعرفي وتتكلمي...اتفضلي بئي

هاتعملي ايه معاها لو عرفت انك نغم اللي بتتكلم عليها...اه صح مش لازم تعرف دا موضوع وخلص خلاص والشخص نفسه مابقاش موجود

طيب افرضي رجع هاتعملي ايه

دماغي ...دمااااااااااااااغي

نغم نغم انتي يابنتي روحتي فين دا كله احنا وصلنا خلاص

انتبهت من سرحاني وشرودي وقولتلها: والله وصلنا خلاص بسرعة كدا

هي: اه وصلنا ....اللي واخد عقلك ياجميل

ماعرفتش ارد عليها والله ..اكتفيت بابتسامة وخلاص

تاني يوم كلمت صاحبتي وقولتلها: هو انا لما قولتلك اني هااركب القطر وانا جايالك انتي ماقولتليش لا ليه؟؟

هي: ماقولتلكيش لاء !!!! واقولك لاء ليه هو في ايه حصل...انتي ركبتي مع الشخص اللي عزم عليكي بشيكولاتة واتكلمتوا

انا: يااااااااااريت ياختي كنت ركبت معاه ياريت

هي: في ايه يانغم احكيلي اللي حصل

انا: قبل مااحكيلك معاكي رقم وزير النقل والمواصلات

هي: نعم...هاتعملي بيه ايه

انا: اقوله يحط اسمي علي قوائم الممنوعين من ركوب القطر..اه يصدر قرار رسمي بكدا ...انا مواطنة مصرية ومن حق البلد انها تاخد بالها مني

هي: هاابئي ادورلك عليه ..احكي بقي ايه اللي حصصصصصصصصل

حكيت لصاحبتي الحوار كله

لاقيتها بتقولي: علي فكرة وزير النقل والمواصلات مش هايقدر يعملك حاجة انتي منك للريس علي طول يصدر قرار رسمي بمنعك انتي واولادك واحفادك ان شاء الله من ركوب القطر

طيب انا اعمل ايه ...خلاص انا ونهلة بقينا اصحاب وهي بتقرب مني كل يوم اكتر من التاني والحق يتقال هي بنت عسولة جدا لدرجة اني كنت بستغرب ازاي سابها تضيع منه....بغض النظر يعني ان في حاجة جوايا ناحيته

.....يتبع

No comments:

Post a Comment